Белорусский экзархат Московского патриархата
HRAMVSR.BY Центр духовного просвещения и социального служения
"Всех скорбящих Радость", Минск
“Любоў да бліжняга праяўляецца і ў любові да сваёй Радзімы”. Айцец Яўген Грамыка – пра Багдановіча, патрыятызм і беларускую мову
| 9 ДЕКАБРЯ 2016 (Пятница) 16:11:07 Напярэдадні 125-годдзя з дня нараджэння Максіма Багдановіча мы сустрэліся з клірыкам мінскай царквы ў гонар абраза Божай Маці “Неўпіваемая чаша” протаіерэем Яўгенам Грамыка. У размове з карэспандэнтам Sobor.by айцец Яўген дзеліцца ўласным стаўленнем да асобы паэта, а роўнеж разважае пра ролю нацыянальнасці і роднай мовы ў жыцці праваслаўнага чалавека.- Што для Вас значыць імя Максіма Багдановіча? - Перш за усё, Максім Багдановіч – адзін з найбольш знакамітых паэтаў Беларусі, можна нават сказаць, народны паэт. Ён напісаў шмат цікавых і прыгожых вершаў на самыя розныя тэмы, і гэтыя вершы вельмі пранікнёныя і мілагучныя. Безумоўна, кожны чалавек, які знаёміцца з беларускай літаратурай, проста не можа не пазнаёміцца з творамі Максіма Багдановіча. - Ці важна ўвогуле для праваслаўных беларусаў чытаць Багдановіча, альбо мы павінны ўсё ж такі канцэнтравацца на духоўнай літаратуры, на Святых Айцах, напрыклад? - Па-першае, не ўсе, можа, і зразумеюць дакладна, што казалі і пісалі Святыя Айцы. Нават не ўсё нам вядома з іх пісанняў, бо шмат з гэтага не перакладзена з грэцкай і лацінскай моў на сучасныя славянскія мовы – ні на рускую, ні тым больш на беларускую. Па-другое, не ўвесь жа час Святых Айцоў чытаць, трэба ж яшчэ нешта. Мне здаецца, што такія прыгожыя творы, якія ўсхваляюць прыроду, усхваляюць каханне, усхваляюць самыя светлыя пачуцці, таксама вельмі карысна чытаць. Мы ведаем, што Бог адкрыўся не толькі ў Святым Пісанні ці ў творах Святых Айцоў, Бог жа адкрываецца і праз прыроду таксама. І калі мы глядзім на прыроду, калі нам падабаецца тое, што мы бачым, мы можам за гэтай прыгажосцю пабачыць Тварца, Які стварыў усё гэта. І таму чаму б не пачытаць творы таго ж Багдановіча, каб яшчэ і яшчэ ўхваліць і прыроду, і тое, што Бог стварыў? - Ці ёсць месца паняццю нацыянальнасці ў праваслаўным разуменні жыцця або мы павінны разглядаць сябе толькі як грамадзян Нябеснага Царства? - Усё ж такі мне здаецца, што радыкальна не трэба падыходзіць да такіх пытанняў. Безумоўна, усе хрысціяне – грамадзяне Нябеснага Царства, і мы ўсе імкнемся туды. Але я магу сказаць так, што любоў да бліжняга і любоў да Бога таксама праяўляецца і ў любові да сваёй Радзімы, а паколькі мы жывём у Беларусі і гэта наша Радзіма, наш народ, то было б вельмі непрыгожа не любіць тую зямлю, той народ, сярод якога мы жывём. Гэта наша зямля, мы тут разам усе жывем, і хочацца тут таксама ўсё ўладкаваць так, каб было па-хрысціянску, каб нашы адносіны паміж сабой і наша жыццё ішло ў рэчышчы хрысціянскіх каштоўнасцей. - Якім, на Ваш погляд, павінна быць месца беларускай мовы ў Праваслаўнай Царкве? - Я думаю, самае галоўнае – тое, што Праваслаўная Царква не павінна цурацца беларускай мовы. Дзякуй Богу, што ў нас ёсць цэрквы, дзе час ад часу адбываецца Літургія на беларускай мове. Першай такой царквой стаў Свята-Петра-Паўлаўскі сабор, дзе раз на тыдзень служыцца Літургія на беларускай мове. У храме Архангела Міхаіла ў Сухарава таксама адбываюцца службы на беларускай мове, раз на месяц. Час ад часу я, як студэнт аспірантуры Мінскай духоўнай акадэміі, таксама ў дамавым храме акадэміі служу Літургію на беларускай мове. Яшчэ я ведаю, што ў Івянцы і ў Гродне, у Каложскай царкве, таксама бываюць такія Літургіі. Гэта паказвае, што ў нас ёсць такія прэцэдэнты. Гэта вельмі добра, і добра, што зараз ужо Новы Запавет цалкам перакладзены на беларускую мову. Зараз, на жаль, няма магчымасці яго выдаць, ён ёсць толькі ў інтэрнэце на сайце Свята-Петра-Паўлаўскага сабора. Таму, калі хтосьці цікавіцца, ён можа зайсці і пачытаць Святое Пісанне на беларускай мове. - Дзякую за размову! Гутарыла Надзея Філіпчык. Чытайце таксама па тэме: Паэт, які шукаў Бога: да 125-годдзя са дня нараджэння Максіма Багдановіча >>> Протаіерэй Сергій Гардун: Праваслаўе як падмурак беларускай нацыі >>> "Мова – гэта душа народа, і калі яна гіне - мы страчваем часцінку сябе". На балючыя пытанні пра беларускую мову адказаў протаіерэй Сергій Гардун >>> / sobor.by/ (просмотров 4760) |
Новости разделов:
|
|||||
|
© www.sobor.by 2004 - 2025. |
|||||