| | 22 ДЕКАБРЯ 2016 (Четверг) 16:38:16 Беларускамоўныя сябры з праваслаўнага Свята-Петра-Паўлаўскага сабора Мінска напярэдадні зімовых святаў зрабілі сваім дзеткам незвычайны падарунак: прыдумалі і распрацавалі са звычайнага кардона чароўную батлейку – ценявы спектакль пра Хрыстова Нараджэнне. Зроблены сваімі сіламі спектакль так спадабаўся і малым, і дарослым, што хутка з ім пачаліся гастролі па сацыяльных дзіцячых установах, а міжнародны фестываль батлеек і тэатра лялек “Нябёсы” пры Свята-Елісавецінскім манастыры ўключыў яго ў сваю праграму. На днях спектакль “Калядная зорка” паглядзелі насельнікі дзіцячага псіха-неўралагічнага інтэрната ў Навінках, а разам з імі і карэспандэнт Sobor.by.
Паказ прайшоў у рамках дабрачыннай акцыі пад час падрыхтоўкі да фестывалю “Нябёсы”, што адбудзецца ў Мінску 12-15 студзеня.
Спектакль глядзелі ў цемры – на фоне падсвечаных дэкарацый разгортваліся перад вачыма біблейскія падзеі - свята нараджэня Госпада Іісуса Хрыста ў дзевы Марыі, уцёк святога сямейства ў Егіпет і злачынства цара Ірада. Дзеці з захапленнем сачылі за гульнёй лялек:
- Такія тэатральныя пастановы – гэта заўжды цікава! А калі яны ў такім міні цёплым утульным крузе – то гэта нават збліжае! Дзеці іх уважліва глядзяць і нават калі некаторыя словы не разумеюць, яны ўсё адно бачаць рух і святло. І нават пасля задаюць пытанні па сюжэту і пасля спектаклю паўтараюць некаторыя фразы – значыць ім гэта цікава і іх гэта чапляе, - лічыць культарганізатар Вольга Гурзова.
Дэкарацыі і фігуркі батлейкі зроблены з танных падручных матэрыялаў - персанажы выразаныя з гофракардону, але гэта незаўважна, бо вобразы стварае гульня святла і ценю (гл. відэа). Ажыўляюць і агучваюць герояў самі аўтары праекта – праваслаўныя дзяўчаты і хлопцы розных прафесій.
- Я архітэктар, жонка мая Кацярына – таксама архітэктар, Павел у нас музейшчык, Вольга ў нас перакладчык. Усе мы праваслаўныя хрысціяне, у нас ёсць дзеці, і мы ладзілі для іх батлейку на Раство, а пасля ўжо пакацілася, - смяецца і прадстаўляе тэатральную трупу Ілля Чыжоў, адзін з акцёраў і распрацоўшчыкаў батлейкі.
Сцэнарый сябры прыдумлялі разам – карысталіся біблейскімі тэкстамі, нешта ўзялі са спектакля беларускага аўтара Сяржука Вітушкі. Пры распрацоўцы персанажаў карысталіся інтэрнэтам, дзе знайшлі чорта, анёла змалявалі з іконы. Зрабілі ўсё за 2 ночы і яшчэ вечар сышоў на арганізацыю дэкарацый.
Пасля паказу батлейкі родным, моладзь пабачыла аб’яву пра штогадовы міжнародны фестываль батлеек і тэатра лялек “Нябёсы” і вырашыла: “даеш мастацтва ў масы!”. Сябры падалі заяўку на ўдзел у фестывалі і папалі ў асноўную праграму.
- Батлейка для нас – гэта магчымасць належна асвяткаваць Раство Хрыстова, падзяліцца радасцю нараджэння Хрыста. Мы бачым, як станоўча рэагуюць на спектакль дзеці і радуемся, што ў нас ёсць магчымасць яўляць і дарыць любоў на тым месцы, дзе мы знаходімся. – дзеліцца ўдзельнік батлейкі Павал Каралёў.
Па словах сяброў, батлейка дапамагае распавесці дзецям у цікавай і дасягальнай форме пра нараджэнне Госпада нашага Іісуса Хрыста, тэатральная пастаноўка акладае гэтую гістарычную падзею ў дзіцячай памяці ў яскравых вобразах. Больш таго, малыя пераймаюць паводзіны дарослых, і ўжо самі ставяць свае інсцэніроўкі.
- Нашы дзеці ўжо добра ведаюць гэты спектакль і спяваюць яго самі. Гэта нас, канешне, вельмі радуе, - кажа Вольга Алейнік, удзельніца батлейкі.
“Калядная зорка” адкрыта да супрацоўніцтва і з радасцю гатова зладзіць дабрачынны выступ з батлейкай перад хворымі ці пакінутымі дзеткамі, якім больш за астатніх не хапае радасці і любові. Дарэчы, гісторыя стварэння гэтай батлейкі паказвае, як проста можна падарыць малым радасць – не трэба шмат грошаў, дастаткова жадання дарослых, трошкі творчасці і трывання і – вуаля, прыгожая казка можа нарадзіцца і са звычайнага кардона.
Кантакт для сувязі з "Каляднай зоркай": +375 29 563-08-25, Ілля.
/ sobor.by/
(просмотров 5420) |
ГЛАВНАЯ
ФОТО
ВИДЕО
АУДИО
НОВОСТИ
ФОРУМ
