| | 29 МАРТА 2017 (Среда) 13:57:22 Год таму - вечарам 29 сакавіка - на 85-м годзе жыцця памёр народны паэт Беларусі Ніл Сымонавіч Гілевіч. Развітанне з ім адбылося 1 красавіка 2016 года ў Свята-Петра-Паўлаўскім саборы Мінска.
Рыцар беларускага слова… Чалавек, закаханы ў жыццё… Ахоўца чысціні беларускай мовы і сямейных каштоўнасцей… Выдатны паэт і сапраўдны патрыёт роднай Беларусі… Шмат добрых словаў гучала пра Ніла Сымонавіча ад людзей, якія мелі шчасце асабіста ведаць паэта…Слёзы ў вачах былі і ў тых, хто ніколі не сустракаў яго пры жыцці… Развітацца з народным дзеячам прыйшлі людзі самага рознага ўзросту, моладзь – у тым ліку.
- Памёр апошні народны паэт Беларусі. Але не толькі паэт, але, канешне, і публіцыст і фалькларыст, і літаратурны крытык. А яшчэ, што важна, грамадзянін. Сапраўдны грамадзянін Беларусі, - адзначыў протаіерэй Сергій Гардун. - У асобе Ніла Сымонавіча мы бачым поўнае спалучэнне і паэтычнага таленту, які ён прысвяціў сваёй зямлі, свайму народу, і вельмі глыбокую цвёрдую патрыятычную пазіцыю, якую ён ніколі не хаваў, заўжды выказваў, адстойваў. А таму не толькі як паэта, але і як грамадзяніна і патрыёта Беларусі мы яго будзем памятаць і цаніць.
Усіх, хто шануе Ніла Сымонавіча, айцец Сергій прызваў маліцца за паэта, і не толькі сёння, а пастаянна.
- Патрыятызм - гэта і ёсць любоў да бліжняга, пра якую нам кажа Евангелле, а таму мы молімся з вераю, што Гасподзь прыме бессмяротную душу Ніла Сымонавіча ў Нябеснае Царства, - заключыў ён.
Спачуванні з нагоды спачыну Ніла Сымонавіча выказалі мітрапаліт Філарэт, Ганаровы Патрыяршы Экзарх усяе Беларусі, і мітрапаліт Мінскі і Заслаўскі Павел, Патрыяршы Экзарх усяе Беларусі.
“Шчырасць, спавядальнасць, грамадзянскасць вершаў Ніла Гілевіча зрабілі яго творчасць неад’емнай часткай беларускай культуры. Роля сапраўднага паэта блізкая да ролі прарока. Сваёй душой ён успрымае дух народа, яго спадзяванні, яго боль, падзяляе з ім трагізм яго лёсу. Такой была творчасць Ніла Гілевіча, пры тым, што заўсёды, нават у самыя цяжкія часы выпрабаванняў, ён заставаўся паэтам, закаханым у жыццё”, — сказана ў спачуванні мітрапаліта Філарэта.
“Адыход з жыцця яркага і таленавітага мастака слова адгукнуўся болем у сэрцах беларусаў. Ніл Сымонавіч усё сваё жыццё і творчасць прысвяціў свайму народу і пакінуў для нашчадкаў каштоўны скарб. Яго шматлікія творы з’яўляюцца неад’емнай часткай беларускай культуры”, — адзначаецца ў спачуванні мітрапаліта Паўла.
Пахаваны Ніл Сымонавіч побач з любімай жонкай, на Кальварыйскіх могілках.
Упакой, Госпадзі, душу спачылага раба твайго Ніла i ўчынi яму вечную памяць.
/ sobor.by/
(просмотров 2157) |
ГЛАВНАЯ
ФОТО
ВИДЕО
АУДИО
НОВОСТИ
ФОРУМ
