Белорусский экзархат Московского патриархата
VSR.SOBOR.by Приход храма иконы Божией Матери
"Всех скорбящих Радость", Минск
14 мая ў Мінску - прэзентацыя альбома “Соль зямлі” камернага хору “Салютарыс”
Грант на запіс альбома “Салютарыс” атрымаў, перамогшы ў конкурсе сацыяльных і культурных праектаў “Social Weekend Belarus 2016”, атрымаўшы фінансавую падтрымку ад Ю. Зісера. Асноваю альбома сталі сучасныя аранжыроўкі і стылізацыі беларускіх народных песен, спецыяльна падрыхтаваных для “Салютарыс” беларускімі кампазітарамі. Мэтаю праекта было падтрымаць маладых кампазітараў Беларусі ў напісанні харавой музыкі і захаванні традыцый беларускага харавога мастацтва. Па значнасці прэзентацыя можа лічыцца адной з найважнейшых для нацыянальнай культуры падзеяў года.
Соль зямлі Sal Terrae
Соль зямлі — глыбіннае, прыроднае, сутнаснае паняцце і адначасова метафара, якою вызначаюць чалавека — соль нашага свету.
Мы ўсе аднолькава перажываем самую сутнасць жыцця: нараджэнне новага чалавека, сталенне, шчасце і боль першага кахання, жарсць, расстанне, перамогі і страты… Гэта знаёма кожнаму і блізка чалавечаму сэрцу, незалежна ад таго, на якой мове пра гэта гавораць… або спяваюць.
Гэты альбом — нашая спроба нагадаць слухачам пра самыя важныя рэчы, вехі чалавечага жыцця, сугучныя таксама і прыродзе, яе адвечным цыклам у няспынным нараджэнні і паміранні, яе прыгажосці і сіле. Мы жадаем, каб вы перажылі эмоцыі, укладзеныя ў гэтыя спевы кампазітарамі, аўтарамі і выканаўцамі, і сярод мітусні і шалёнага рытму сучаснага жыцця вастрэй адчулі: вы — людзі, вы — соль зямлі.
Камерны хор "Салютарыс"
Змешаны аматарскі хор, заснаваны ў 2007 г. Вольгай Янум, выконвае музыку розных кірункаў, у тым ліку і кампазіцыі, напісаныя адмыслова для хору. "Салютарыс" вядзе актыўную канцэртную дзейнасць, удзельнічае ў фестывалях і конкурсах харавога мастацтва, займаючы ў іх прызавыя месцы. За 10 гадоў існавання хор наведаў з канцэртамі ўжо 16 краінаў: Вялікабрытанію, Балгарыю, Германію, Ірландыю, Іспанію, Італію, Латвію, Літву, Польшчу, Расію, Сербію, Славенію, Францыю, Украіну, Чарнагорыю, Эстонію.
Адметнасцю хору з’яўляецца тое, што ў ім спяваюць людзі розных прафесій, неабавязкова з прафесійнай музычнай адукацыяй. Усіх іх аб’ядноўвае любоў да музыкі і харавога мастацтва і жаданне ствараць прыгажосць.
Дырыжор і мастацкі кіраўнік хору "Салютарыс" Вольга Янум
У 1994 г. скончыла Беларускую дзяржаўную акадэмію музыкі па спецыяльнасцях харавога дырыжыравання і вакалу.
З 1993 г. з’яўляецца рэгентам вялікага хору ў царкве Маці Божай "Усіх тужлівых радасць" ў Мінску.
З 1995 г. навучае вакалу і харавому спеву ў Мінскай праваслаўнай духоўнай вучэльні.
З 2007 г. выкладае на факультэце харавога дырыжыравання Беларускай дзяржаўнай акадэміі музыкі. У гэтым жа годзе заснавала камерны хор "Салютарыс", які стаў пераможцам шматлікіх міжнародных конкурсаў і фестываляў.
У 2008-2010 гг. працавала галоўным дырыжорам і мастацкім кіраўніком Акадэмічнага хору Белтэлерадыёкампаніі.
За сваю працу Вольга Янум узнагароджаная Ордэнам Роўнаапостальнай княгіні Вольгі ІІІ ступені, медалём св. Еўфрасінні Полацкай і іншымі ўзнагародамі
Тэатр пластычнага танца “Альтана”
Творчасць “Альтаны” – гэта сінтэз любові да класічнага танца і яго эстэтыкі і жывой зацікаўленасці ў сучасных кірунках і свабоднай пластыцы. У 2015 г. тэатр стаў лаўрэатам ІІІ прэміі беларускага конкурсу сучаснай харэаграфіі IFMC у Віцебску. Мастацкі кіраўнік: Ганна Корзік.
У нашым канцэрце ў выкананні артыстаў тэатра адбудуцца незвычайныя пластычныя імправізацыі, якія ствараюць казачную атмасферу і арганічна гарманіруюць з гукавай палітрай гэткіх жа незвычайных харавых твораў.
Кампазітары, удзельнікі праекта:
Анастасія Бендэрская
Таленавітая студэнтка 5 курса кафедры кампазіцыі ў Беларускай дзяржаўнай акадэміі музыкі. Спявае ў хоры "Салютарыс" з восені 2013 г., дзе і пачала кар’еру харавога кампазітара. Яе творы ляглі ў аснову альбома "Соль зямлі" і адзначаныя ўзнагародамі на міжнародных конкурсах.
Вольга Вараб’ёва
Выпускніца Беларускай дзяржаўнай акадэміі музыкі, кафедры фартэпіяна. Кампазітар, салістка і мастацкі кіраўнік вядомага вакальнага ансамбля "Камерата".
Вольга Падгайская
Выпускніца кафедраў кампазіцыі і арганаў Беларускай дзяржаўнай акадэміі музыкі. Удзельніца ансамбляў новай камернай музыкі "Five-storey ensemble" і "Rational diet". Лаўрэат міжнароднага конкурсу кампазітараў у Санкт-Пецярбургу (2014), стыпендыят польскай дзяржаўнай праграмы "Gaude Polonia".
Андрэй Саўрыцкі
Выпускнік Беларускай дзяржаўнай акадэміі музыкі, кафедры харавога дырыжыравання. Дырыжор Акадэмічнага хору Белтэлерадыёкампаніі. Выкладчык на кафедры харавога дырыжыравання ў Беларускай дзяржаўнай акадэміі музыкі. Узнагароджаны Нацыянальнай музычнай прэміяй як лепшы аранжыроўшчык (2014).
Ігар Янкоўскі
Выпускнік Беларускай дзяржаўнай акадэміі музыкі, Акадэмій музыкі у Быдгашчы і Варшаве (Польшча). Лаўрэат многіх конкурсаў кампазітараў, аўтар больш за 100 харавых твораў. Узнагароджаны прэміяй Міністэрства культуры Польшчы (2014). Дырэктар Міжнароднага культурнага фонду "MSM UNICUM", які арганізуе канцэрты і фестывалі беларускай культуры ў Польшчы.
Канстанцін Яськоў
Выпускнік кафедраў кампазіцыі і дырыжыравання Беларускай дзяржаўнай акадэміі музыкі. Стыпендыят польскай дзяржаўнай праграмы "Gaude Polonia". Кандыдат навук, мастацтвазнаўца. Выкладчык кафедры беларускай народнай спеўнай творчасці ў Беларускім Дзяржаўным Універсітэце Культуры і Мастацтва./ sobor.by/
(просмотров 3376)
Новости разделов:
|
|||||
|
© www.sobor.by 2004 - 2026. |
|||||